تجربتي في معهد الابحاث KISR

KISR = Kuwait Institute for Scientific Research  
معهد الكويت للابحاث العلميه 
تعرفت على الدوره الصيفيه التابعه لمعهد الابحاث من خلال اخوي اللي كان طالب في الدورة ال32 وانا دشيت الدورة ال34 يعني الدوره وايد قديمه بس للاسف مايسوون لها دعايه واعلانات بس معتمدين على ان يقدمون 5 استمارات حق كل مدرسه والمدرسه اساسا مو مهتمه بالموضوع فيعني مايعرف الدورة الا اللي ناطرها لان يكون عارفها او سامع عنها من احد .
 التسجيل 
في ايام امتحانات الفاينل (الاسبوع اللي قبل الامتحانات) دشيت غرفه الاخصائي الاجتماعي ولا يلفت نظري كتيب صغير كان عالطاوله  ..خذيتهم كلهم (5 كتيبات) ولا يطلع  استماره تسجيل بمعهد الابحاث رحت البيت سجلت بياناتي واليوم اللي بعده رحت مع ابوي عشان اعطيهم استماره التسجيل والمفروض انه فيه مقابله شخصيه بس طلعت مجرد حوار مع المسؤوله 
شروط الدوره : 
تكون طالب بالصف العاشر او الحادي عشر (علمي) وتكون نسبتك اعلى من 75%  
التخصص
اساس الدورة انك تختار واحد من التخصصات الموجوده :
 1) الهندسات : هندسه ميكانيكيه او كيميائيه او كهربائيه او كبيوتر ويتم تدريس التخصص بكليه الهندسه بالخالديه التابعه لجامعه الكويت 
2)الكيمياء : ويتم تدريس الكيمياء بكليه العلوم 
3)الاحياء : ويتم تدريس الاحياء بكليه العلوم 
4)علم الجينات : يتم تدريسهم بمختبرات الجينات في معهد الابحاث نفسه 
الوقت وبرنامج الدورة :
الساعه 8 الصبح في محاضره اللغه الانجليزيه ويوزعونهم على صفين حسب المستوى 
الساعه 9 محاظره تغذيه (اخصائيه تغئيه)
الساعه 9:45  بريك بكافتيريا المعهد 
الساعه 10:30 كل واحد يروح تخصصه 
الساعه 2 يرجع كل واحد بيتهم 
الدوام من الاحد لي الاربعاء والخميس يوم ترفيهي 
والحين اخليكم مع الصور .. 

وبصراحه انا عن نفسي اعتبر هذي الدورة من اقوى الدورات التدريبيه اللي تصقل الشاب حيث فيها التدريب والوناسه و فرصه تتعرف على خيره الناس وتكون صداقات واهم شي فيها اكل !! 
وعلى حد علمي انه فيه دورة ربيعيه بعد (بعطله الربيع ) .. وانصح كل واحد بعمري او بالسنين اليايه انه يشترك بهذي الدورة  وتقييمي لهذي الدورة 5|5 
والسلام عليكم ورحمه الله وبركاته ..