نـجــم عـلــى الـطـريــق / عـمـــار الــعــطـــــار

نـجــم عـلــى الـطـريــق / عـمـــار الــعــطـــــار

رحله الى جزيرة كبر

قامت القائمه المستقله التابعه لكليه الهندسه بجامعه الكويت بعمل رحله بحريه قبل البدء بالدوام في الجامعه وذلك للطلبه المستجدين والقدامى لكي يتم التعارف فيما بينهم .. وطبعا اخوي (علي) احد هؤلاء المستجدين ,, سووا قطيه قيممتها 10 دنانير للفرد ورحله بحريه الي جزيره كبر لمده 12 ساعه وكل شي موجود عندهم من مأكولات ومرطبات , يعني اللي عليك تلبس شورتك وتييب جنطتك و تدفع فلوسك وتيي تستانس ,, طبعا كون العلاقه وطييده اللي تجمعني مع اخوي العود بوعلوه ,, رزيت ويهي مع اخوي , ودفت المبلغ ورافقتهم هذي الرحله البحريه العجيبه 
 ___ 


بصراحه الموضوع انعرض علي بشكل سريع تقريبا عالساعه 12 والرحله الساعه 8 الصبح ,, من امه موافق !!! منو اللي يطوف رحله مثل هذي ؟؟!!


المهم زهبت شغلي وقشي , (جنطه داخلها الفوطه , والنظاره , والتان , وفنيله احتياط , والتلفون , والكاميرا ) وانطلقنا باتجاه نادي اليخوت اذا ماخاب ظني اللي يم مطعم مركز سلطان  , ركبنا اليخت المقصود واللي هو سلسان 4 
انا بصراحه رايح من قبل رحلات بحريه مع سناسين اخري = سلسانات , بس اول مره اركب سلسان 4 اللي هو تقريبا اقوى يخت ركبته !! راهي وواسع وحلو .. ومبين نظيف ويديد .. 
فيه تحت غرفه فيها 4 اسرَه , والدور الارضي في صاله كبيره , والدور الثاني سطح على طوول اليخت ومنظر نااااار 


انطلقنا بحدود ال 9 صباحا , والمفروض انه تستغرق الرحله لي كبر 3 ساعات , بس احنا وصلنا الساعه 12 كون اليخت عود والامواج عاتيه (شفيييييييييه سندباد) XD 
طبعا اليخوت الكبيره ماتقدر توصل لي اليال فاحنا كنا ساحبين معانا باليخت طراد صغيرون عشان يودينه من اليخت لي الجزيرة والعكس ! 
قعدنا بكبر نتشمس ونتسبح من ال 12 لي الساعه 6 العصر وبعدها ردينه لي الديره ,, عالساعه 8 ونص وصلنا الديره  وطول الطريج كانت فيه حلقات كوووت بو 3 و بو 6 ودامه .. وغمزه وبلايستشين بس ناسين شاحن اليده يعني ماكوا فايده وهمن في تلفزيون ورسيفر (لاوالله احلف ؟)


المواقف المضحه : 
* اول ما وصلنا وتجمعوا الشباب ولا جم واحد من الربع الموجودين مو يايب معاه شورت سباحه ( لاوالله احلف ؟؟ يعني ياي كبر بتتسبح بجينز ؟ ) .. فقررنا نروح مركز سلطان اللي يم الفنار ونشتري شورتات .. واحنا طالعين مرينا على  سوبر ماكرت صغير بالنادي عند الدخله بس قلنا لا ما اتوقع عنده , رحنا مركز سلطان بس مالقينا شورتات ,, ردينه مكانه ولا الشباب يقولون ويينكم انتو ؟؟ تعالوا هالسوبر ماركت عنده شورتات !!!!!!! O.O الشباب شروا وركبنا اليخت 


* اكوا واحد من الشباب اللي مفروض يي معانا داق تلفون الساعه 9 يقول : شبااااااااااااب نطروني توني طالع من المنقف !! اي كانه شوووفنا قاعدين ننطرك XD 


*بال 3 ساعات الاولى واحنا رايحين كبر , الشباب اللي مثلي المطفوقين اللي  يبون يسوون تااان مافيهم صبر نوصل الجزيرة وينتنون ,, بالطريج كل واحد فصخ وحط تان ونايم باليخت XD شفيك حبيبي الشمس ماراح تطير 


* بعد ما وصلنا الجزيره ركبنا الطراد الصغيرون ورحنا فيه الجزيره ,, طبعا من كثر ما انه بعض الناس مطفوقين وبسرعه بس يبون يحطون اقدامهم عالجزيره جنهم بيستكشفونها (اخوي الحبيب)  ياي ومو مبدل هدومه ,, يعني باختصار العموم لابس شورته ومطلع السكس باك وبايدي الولاعه والباكيت والتان والسن ان واخوي ياي بهدومه ناسي انه راح يتسبح .. لاحبيبي احنا يايين نتكوكس -.-


*اول ماوصلنا الجزيره ,, لقيت بطل خمر رد ليبل ,, وهمن فودكا الماني الصنع .. هلا بالحبيب XD حطيته يم الجنطه عشان اخشه ذكره بس للاسف نسيتهم بالجزيره ,, عاد عليه بصماتي يعني احتمال كبير اني مشتبه فيه !!!


* طبعا يمنا يخوت صغيره فاصله .. اغاني ورقص شباب وبنات بمايوهات السباحه (عشان جذي كبر حلوة ) بس اغانيهم دااااااااااااااجه انا ذبت اشكره حبك فيني سره ,, يخرب بيتكم يامال يصير يختكم مثل ما صار بسفينه تايتنك  ,, عاد الاطرف بالموضوع انه حزه صلاه العصر الشباب راحوا يقولولهم صكروا الاغاني بنصلي .. والله تصدقون سمعوا الكلام ( عاد كلهم اجساااام بوكس يوديك القدس )


*واحد من الشباب قص علي وعطاني هذا اللي اسمه سن ان وقالي حطه خوش تان حق الشعر .. عاد انا غشيم حطيييته ومادري عن السالفه لمن وصلت البيت وشفت نفسي بالمنظره انصدمت !!! جني عيوزه حاطه حنه .. !! يقول اشقر يقوول !! صار برتقالي :@


*بال3 ساعات الاخيره انا كنت نايم بسطح الطراد .. وانا نايم قعدت على صوت التصفيق والشيلات والصيحات ولا الشباب قاعدين يفنون اغاني القائمه العلميه .. علميه هياا هيا مادري شنو !!  مباراه ؟!!


وبالنهايه اشكر كل القائمين على هذي الرحله العجيبه اللي اعتبرها من اقوى الرحلات البحريه اللي رحتها ,, وهمن اشكر اخوي اللي خلاني اروح معاه واحتك مع ناس صج فاهمه ومحترمه وتعرفت على بعض الشباب الاياويد .. فكانت صج فرصه حلوة للتعارف 
واخليكم مع الصور : 

منطقتي السكنيه المنصوريه

المنصورية،

يالربع انا ساكن بمنطقه المنصوريه , وودي اعطيكم جم معلومه عن هذي المنطقه السعيده 

*سميت بهذا الاسم نسبه الي الاهازيج التي كانت تقال عندما كان يخرجون من المدرينه ويحتفلون في هذه المنطقه , فقد كانوا يقولون : طلعنا من باب السور ,, بيرقنا بيرق منصوور 

*المنطقه تقع في محافظه العاصمه , واهيا من اقدم المناطق واعرقها بالكويت (نصاب)

*يحيط بالمنطقه اربع طرقات رئيسيه وهي : طريق المغرب السريع , الدائري الاول , الدائري الثاني , وطريق القاهره ,,, ويجاورها المناطق التاليه : مدينه الكويت , ضاحيه عبدالله السالم , الدسمه , القادسيه >3 , الدعيه , النزهه 

*منطقه المنصوريه اهيا اصغر منطقه بالكويت لان فيها بس (قطعتين) !!!!!!!!!!! 1 و 2  

معنها قطعتين بس نصها النادي العربي الرياضي , و فيها 4 مدارس , و 3 حدايق عامه , و مسيدين , و جمعيه وفرع و مستوصف ومختاريه و مطاعم كبيره و عصير ومحيسن و كل شي موجود اف باجي الجمعيات همن فيها مركز الثقافي البريطاني , ومركز البحوث والدراسات الكويتيه , والسفاره الفرنسيه وبيت السفير الايراني , يعني شنو بقا فيها من بيوت ؟ بس بيتنا وبيت جيرانه 

المزايا : 

*المنطقه هاديه لابعد الحدود واغلب سكانها من فئه الشيخوخه يعني كل بيت يسكن فيه جد و جده , وان زاد يمكن بنتهم الصغيره , اصلا لو تلعب لعب كره ساعه كامله مع ربعك ما تمر ولا سياره بالشارع 

* اذا عندك ياهال صغار اشترله قاري وخله يسوق بالسكه .. ولا تحاتي ماراح يضيع كلها قطعتين وماكوا سيارات وايد يمرون  

* المنطقه قريبه واايد وكل شيء يمك الافنيوز و360 من غير زحمه 15 دقيقه بالضبط  .. السالميه اطلع عالحب وتوصل اصلا شارع الحب اروحله مشي من بيتنا و اغلب التضبيط عقب مايلحقها البنيه تروح مصافط النادي ويضبط شغله الريال وانا لاعب بالنادي اروح كل يوم  , يعني ماكوا واحد بالكويت مضبط من الحب انا ما شفته مع صاحبته XD 

* خدمات المنطقه وايد زينه من كهرباء ومااي 

* قتلكم مافيها زحمه , يعني مااذكر مره شريت من جمعيه المنصوريه ونطرت دور بالكاشير .. وكل اللي يشتغلون بالجمعيه يعرفوني لان ماكوا اوادم يوون غير بيتنا والبيت اللي يمنا 

* المستوى المادي لاسر المنصوريه يعتبون من مستوى الدخل المتوسط لي الاقرب الي المرتفع  بس مثل ما قتلكم كله جد وجده بس نهايه الاسبوع والزوارات تلقى مواتر 

* في وايد حسينيات بالمنطقه يعني كل مناسبه دينيه تلقى طاقين باب بيتكم يايبيلكم عيش .. وانا واحد من عشاق عيوش الحسينيات , اما اللي يكره الشيعه ومايواطنهم ومايحب شعائرهم اقووله دورلك منطقه ثانيه 

* مافيها حوادث .. ولا مشاجرات ولا معاكسات تذكر ,, والمراهقين اللي مثلي اللي مسوين روحهم كبار ياخذله سياره ويتمشى من اسهل ما يمكن وماكوا مراهقين يتيمعون بالجمعيات وقوواري ولوويه ,, بس خل اكون صريح مرات ايام الفاينل في بنات يتيمعون بالجمعيه .. بس الحق يقال : يقوولك احلى بنات الكويت واذربهم بنات ثانويه المنصويه .. ولك اصلن لمن ارد من المدرسه لازم انطول الطريج ونمر صوب ثانويتهم :$ 

* من مزاياه المنطقه انه الكل يعرف الثاني وانا  مثلا الحين انا فكرت اتزوج ,, عاد خدامه القطعه الثانيه تقوولي مبروك منك المال ومنها العيال !! 

العيوب : 

* اذا احترق بيتكم او السياره بنجرت محد راح يساعدك لان سكان البيوت كلهم من فئه الشيخوخه .. (يعني انشالله الشايب ما يطلع بعكازته ويساعدك .. زين منه يمشي ,, ولا العيوزة لاهيا تسوي الهريس شعرفها .. ! )

* بالنسبه حق المراهقين الصايعين : كلش ماانصحهم بهالمنطقه لان كلش ماكوا بناات بالمنطقه ساكنين .. بس بنهايه الاسبوع راح تشووف مالا عين رأت ولا اذن سمعت .. ويمكن تلقى خوش ناس بالجمعيه بنهايه الاسبوع 

* بالنسبه حق البنات : اغلب الشباب اللي ساكنين بالمنصوريه (احنا) او حتى اللي يزورين يعتبرون من مزايين الكويت وعندهم مواتر يعني عادي تمشي بالشارع تلقي وحده ميته بالشارع لانها تشتغرب من كثر الشباب المزايين وعيبهم انهم مايعطون ويه الا اذا ... 

 وبالنهايه : راح افارق منطقه المنصوريه لان احنا ساكنين اف بيت يدي (اهل امي) وقاعدين نبني بيتنا اليديد واحنا بمرحله التشطيب 

واشكر هذي المتطقه اللي ربتني وصارت اهيا دنيتي ويدي ويدتي اللي مااقدر افارقهم لان انا بصراحه اي احد يسألني منو رباك ؟ اقووله امي وابوي ويدي ويدتي .. ويمكن الخدامه مراات XD  اكيدن بدامي كويتي 

اسنان زوجتي

نفس هالليله من السنه اللي طافت كتبت بالفيس بوك : 

كلكم شفتوا دعايه اسنان كلينك. مسكين الريال ..خاطب وحدة مبين انها حلوة ..اخر شيء اسنانها زباله تلوع الجبد !! ...اي اي يالشباب ..احنا لازم نسوي حمله ضد اسنان البنات التعبانه !!..وانتوا بعد يالبنات ..خو اهتموا باسنانكم ..ماصار .واحنا ننبح !!..وانا من الحين اقووول ..اذا خطبت اول مااشووف البنيه ..وحتى قبل لا اسلم عليها ..بقولها فتحي حلجج بشووف اسنانج !!

 

Toms shoes

في هبه يديده الحين عندنا بالكويت .. واللي اهيا عزكم الله احذيه تومز (TOMS)  الحين كثير من الناس او اللي مهتمين بالموضه والهبات راح يلاحظون انتشار الاحذيه الخفيفه بالمحلات التجاريه بس اغلب هذي الاحذيه مو مريحه فيعني اللي بيتبع هذي الموضه انصحه باحذيه التومز وتقدرون تطلبونهم اونلاين من النت وفي الوان واشكال وايد وانا بعد بطلب :$
وهذي اهيا صور احذيه تومز

صور القرقيعان

خلص القرقيعان وكلنا استانسنا اكيد ويمعنا القرقيعان  واللي قرقع واللي وزع قرقيعان واللي باق من اخوانه قرقيعانهم .. بس القرقيعان اللي كان بالمركز العلمي غير !! غير القرقيعان كان بوطبيله موجود والطار والدنبك حيث قام بهذه المهمه الموظف المرشد خليفه الخليفه وعبدالله اسماعيل  وساعده المتطوعين بالمركز العلمي .. وكان همن في مسابقات اللي مسكها الشقردي عبداللطيف بورحمه وفاطمه .. 

اما باجي المتطوعات قاموا بال (work shop ) حيث قاموا بتزيين حقائب القرقيعان للزوار بالاضافه اللي العرائس 

وهذي اهيا صور القرقيعان اليي صار